पिंगळाई मातेच्या आशीर्वादाने शेतकरी सहकारी पॅनलची घोषणा  मोर्शी कृषी उत्पन्न बजार समिती निवडणूक

मोर्शी :

 खासदार डॉ.अनिल बोंडे व नरेशचंद्र ठाकरे यांच्या नेतृत्वातील ‘शेतकरी सहकार पॅनल’ची घोषणा आज, रविवारी पिंगळाई गडावर आयोजित एका बैठकीत करण्यात आली. पॅनलमधील उमेदवारांची घोषणा करत सर्व उमेदवारांना प्रचंड मताधिक्याने विजयी करा, असे आवाहन देखील खा. डॉ.अनिल बोंडे यांनी यावेळी पदाधिकारी, कार्यकर्त्यांना केले.

मोर्शी कृषी उत्पन्न बाजार समितीच्या निवडणुकीकरिता खासदार डॉ.अनिल बोंडे व नरेशचंद्र ठाकरे यांच्या नेतृत्वातील पॅनलने जोरदार शक्ती प्रदर्शन करत निवडणूक प्रक्रियेत आघाडी घेण्याचा संकल्प व्यक्त केला.

पिंगळाईमातेच्या आशीर्वादाने पिंगळाई गडावर आज शेतकरी सहकारी पॅनलच्या पदाधिकाऱ्यांची बैठक आयोजित करण्यात आली होती. दरम्यान संपूर्ण उमेदवार व पदाधिकाऱ्यांनी पिंगळाई देवीचे आशीर्वाद घेत प्रचाराचा नारळ फोडला. उमेदवारांची घोषणाही केली. यावेळी उपस्थित उमेदवार, कार्यकर्त्यांना मार्गदर्शन करताना खासदार डॉ.अनिल बोंडे म्हणाले की, पॅनलच्या उमेदवारांनी, पदाधिकाऱ्यांनी व कार्यकर्त्यांनी नियोजनपूर्वक प्रचार करून सर्वांना मोठ्या मताधिक्याने निवडून आणण्यासाठी परिश्रम घ्यावे.

मोर्शी कृषी उत्पन्न बाजार समितीचा सर्वकष विकास करण्यासाठी शेतकरी सहकार पॅनल सदैव अग्रेसर असेल. अकोला कृषी उत्पन्न बाजार समितीमध्ये शेतकऱ्यांना ज्या पद्धतीने सोयी सुविधा उपलब्ध करून दिल्या जातात त्याच धर्तीवर मोर्शी कृषी उत्पन्न बाजार समितीमध्ये ही सुविधा उपलब्ध करून दिल्या जातील, असा उल्लेख करत पॅनलच्या सर्व उमेदवारांना प्रचंड मताधिक्याने विजयी करण्याचे आवाहन खासदार डॉ.अनिल बोंडे यांनी केले. बैठकीला नरेशचंद्र ठाकरे अशोक रोडे, अरुण कोहळे, बंडू साउथ, प्रवीण राऊत, संजय तट्टे, संजय अकोलकर, संदीप रोडे, दत्ता गेडाम, अब्दुल रहीम कुरेशी, प्रभाकर जवंजाळ यांच्यासह संपूर्ण कार्यकर्ते पदाधिकारी मोठ्या संख्येने उपस्थित होते.