रात्री १० वाजतानंतर लाऊडस्पिकर वाजले तर होणार कारवाई

विदर्भ प्रजासत्ताक

दि.९  अमरावती

अमरावती जिल्ह्यात विधानसभा निवडणुकीची आदर्श आचारसंहिता १५ ऑक्टोबरपासून सुरू झाली असून २५ नोव्हेंबरपर्यंत कायम राहणार आहे. ही निवडणूक विना अडथळा व शांततेने पार पाडण्यासाठी निवडणुकीच्या काळात लाऊडस्पीकर वापरण्यावर आयोगाने निर्बंध घातले आहेत. या नियमानुसार रात्री १० वाजतानंतर लाऊडस्पीकर लावल्यास कारवाई होऊ शकते. यासाठी तहसील व पोलिस प्रशासनाची लेखी परवानगी घेणे बंधनकारक आहे.

जिल्ह्यात विधानसभा निवडणूक कालावधीत उमेदवारांकडून शहर तसेच ग्रामीण भागातही लाऊडस्पीकरद्वारे प्रचार यंत्रणा राबविली जाते. याच अनुषंगाने निवडणूक आयोगाने काही निर्बंध लागू केले आहेत. त्यानुसार जिल्ह्यातील आठ ही विधानसभा मतदारसंघाच्या हद्दीत कोणत्याही वाहनावर ध्वनिक्षेपक बसवून त्याचा वापर फक्त सकाळी ६ ते रात्री १० वाजेपर्यंतच तोही संबंधित पोलिस ठाण्याचे अधिकारी यांची रीतसर परवानगी घेऊनच करता येणार आहे.

वाहन चालू ठेवून ध्वनिक्षेपकाचा वापर करता येणार नाही. सर्वप्रकारच्या ध्वनिक्षेपकाच्या वापरास वाहनावर बसवून किंवा अन्य प्रकारे दररोज सकाळी ६ वाजल्यापासून ते रात्री १० वाजेपर्यंत परवानगी राहील. सर्व

राजकीय पक्षांचे पदाधिकारी, निवडणुकीतील उमेदवार किंवा ध्वनिक्षेपकाच्या वापराचे परवानगी विवरण मतदारसंघ निवडणूक निर्णय अधिकारी व जवळच्या पोलिस ठाण्याला देणे बंधनकारक राहील.