बंदुकीच्या धाकावर अपहरण करून बलात्काराचा आरोप:सबळ पुराव्यांअभावी आरोपीची निर्दोष सुटका, नागपूर न्यायालयाचा निकाल
नागपूर
बंदुकीच्या धाकावर अपहरण करून बलात्कार केल्याच्या आरोपांमधून जिल्हा व सत्र न्यायालयाने एका आरोपीची निर्दोष सुटका केली आहे. सबळ पुराव्यांअभावी न्यायालयाने हा निर्णय दिला.
नानक लालताप्रसाद यादव असे निर्दोष सुटका झालेल्या व्यक्तीचे नाव आहे. २०१७ मध्ये ही घटना घडली होती, जेव्हा तक्रारदार महिला आपल्या मुलीला डबा देण्यासाठी इटर्निटी मॉलमध्ये गेली होती. मॉलबाहेर पडत असताना एका कारने तिचा पाठलाग केला आणि बंदुकीच्या धाकावर तिचे अपहरण केले, असा आरोप होता.
अपहरणांनंतर अज्ञातस्थळी नेऊन कारमध्ये बलात्कार करण्यात आला आणि घटनेची व्हिडिओ चित्रफीत तयार करून समाजात बदनामी करण्याची तसेच जीवे मारण्याची धमकी दिल्याचे तक्रारीत म्हटले होते. या प्रकरणी कपीलनगर पोलीस ठाण्यात गुन्हा दाखल करण्यात आला होता.
या प्रकरणाची सुनावणी न्या. श्रीमती एस. पी. पोंक्षे यांच्यासमोर झाली. सरकारी पक्षाने तक्रारदार महिला, तिची मुलगी, मुलगा, पंच साक्षीदार आणि तपास अधिकारी यांची साक्ष नोंदवली.
आरोपीच्या वतीने ॲड. मंगेश डी. राऊत यांनी साक्षीदारांचा उलटतपास घेतला. ॲड. नाझिया पठाण यांनी त्यांना सहकार्य केले. सर्व साक्षपुरावे आणि दोन्ही पक्षांचा युक्तिवाद ऐकल्यानंतर न्यायालयाने सबळ पुराव्यांअभावी आरोपीची निर्दोष सुटका केली.
